គណៈប្រតិភូព្រឹទ្ធសភា អញ្ជើញគោរពវិញ្ញាណក្ខន្ធលោកអនុសេនីយ៍ត្រី សោ វុទ្ធី
នាព្រឹកថ្ងៃទី១២ ខែមិថុនា ឆ្នាំ២០២៥ ឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភា និងលោកជំទាវ ព្រមទាំងឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា បានដឹកនាំគណៈប្រតិភូព្រឹទ្ធសភា អញ្ជើញគោរពវិញ្ញាណក្ខន្ធលោកអនុសេនីយ៍ត្រី សោ វុទ្ធី មេបញ្ជាការកងអនុសេនាតូចស៊ើបការណ៍វរសេនាតូចលេខ៣៩២ នៅទីបញ្ជាការវរសេនាតូចអន្តរាគមន៍លេខ៣៩២ ខេត្តព្រះវិហារ។
ថ្នាក់ដឹកនាំ សមាជិក សមាជិកាព្រឹទ្ធសភា ថ្នាក់ដឹកនាំ មន្ត្រីរាជការនៃអគ្គលេខាធិការដ្ឋានព្រឹទ្ធសភា ពិតជាមានសេចក្ដីក្ដុកក្ដួលរំជួលចិត្តឥតឧបមារដោយបានទទួលដំណឹងដ៏សែនក្រៀមក្រំជាទីបំផុតពីការបាត់បង់ លោកអនុសេនីយ៍ត្រី សោ វុទ្ធី គឺជាការបាត់បង់នូវ ប្តីជាទីស្រលាញ់ និងជាការបាត់បង់អតីតនាយទាហានមួយរូប ពោរពេញទៅដោយមនសិការស្នេហាជាតិដ៏ពិតប្រាកដ ដែលក្នុងមួយជីវិតរបស់លោកអនុសេនីយ៍ត្រី សោ វុទ្ធី បានធ្វើពលិកម្មគ្រប់បែបយ៉ាង និងការលះបង់ដ៏ធំធេង ក្នុងបុព្វហេតុជាតិ សាសនា ព្រះមហាក្សត្រ ជាពិសេសក្នុងបុព្វហេតុការពារជាតិ មាតុភូមិ និងប្រជាជនកម្ពុជា កន្លងមកប្រកបដោយទឹកចិត្តភក្ដីភាពជាទីបំផុត។
រូបរាងកាយរបស់លោកបានបាត់បង់ទៅក៏មែនពិត តែកិត្តិយស សេចក្តីថ្លៃថ្នូរ និងគម្រូវីរភាពដ៏ឧត្តុងឧត្តមរបស់លោកនៅតែស្ថិតស្ថេរជានិច្ចនិរន្តរ៍ នៅក្នុងក្រអៅបេះដូងរបស់យើងខ្ញុំទាំងអស់គ្នាជារៀង រហូតមិនអាចបំភ្លេចបានឡើយ។
សូមជម្រាបថា លោកអនុសេនីយ៍ត្រី សោ វុទ្ធី បានទទួលមរណភាពវេលាម៉ោង៦:២៥នាទីព្រឹក កាលពីថ្ងៃទី១០ ខែមិថុនា ឆ្នាំ២០២៥ ក្នុងជន្មាយុ៤៨ឆ្នាំ ដោយរោគាពាធ ក្នុងពេលកំពុងបំពេញភារកិច្ចការពារជាតិមាតុភូមិ បូរណភាពទឹកដី និងអធិបតេយ្យភាព។
ប្រភព៖ នាយកដ្ឋានព័ត៌មាន
